Operasjonsleiar Ole Bjørn Harang ved Sunnmøre politidistrikt seier dei har fått mange meldingar i løpet av natta. Foto: Remi Sagen / NRK
– Det har kome meldingar om lause gjenstandar gjennom heile natta, men det ikkje meldt om store skadar på verken folk eller dyr, seier operasjonsleiar Ole Bjørn Harang i Sunnmøre politidistrikt.
Taket blei liggande nedover veggen på stadion etter at vinden hadde herja med det. Foto: Ekornesvåg, Svein Ove / NTB scanpix
Vinden førte til at delar av taket på Color Line stadion i Ålesund løsna i den sterke vinden.
– Vi fekk melding om dette i natt, ja, og området har blitt sikra, seier Harang.
Området er no sperra av og skadane blir vurdert så snart det er lyst.
Straumstans fleire stader
Mange hadde merka seg varselet om storm på kysten. Foto: Meteorologisk institutt
Måndag kveld var straumen borte på i Gjemnes og på Søre Sunnmøre.
Istad Kraft melder at dei hadde eit straumutfall i området frå Batnfjord sentrum til Hoem seint måndag kveld. Dette skuldast trefall over høgspentlinja. Om lag 500 kundar var råka, men dei fleste hadde straumen tilbake innan klokka 01.00.
Mørenett skriv på sine nettsider at dei har hatt kortare straumutfall i Ulstein, Hareid, Vanylven og Sande på grunn av vind og lynnedslag. Nokre stader har det ikkje vore råd å rette feilen i løpet av natta på grunn av verforholda.
Også fleire ferjesamband har vore innstilte på grunn av den sterke vinden.
– Kan bli fleire meldingar når det blir lyst
Harang ser ikkje bort frå at det vil kome fleire meldingar når det har blitt lyst.
– Det kan jo vere at folk oppdagar meir når dei har fått stått opp og sjekka. Men vi håper det ikkje er store ting.
Politiet på Sunnmøre bad elles folk vere forsiktige i går kveld. Harang seier det kan verke som om folk har halde seg inne i stormen.
– Det er vel slik at folk på kysten er vane med mykje ver, så dei passar på både hus og folk. Så det gjer nok at det er mindre ferdsel ute.
Rør i vegbanen
Også politiet på Nordmøre og i Romsdal har merka stormen i natt, men heller ikkje her er det meldt om store skadar. I Molde blei det meldt om rør som hadde hamna i vegen.
Det blei også meldt om tre som sperra vegar fleire stader. I tillegg føret tette rister til at det blei mykje vatn i vegen i Batnfjord sentrum.
Publisert Oppdatert
No comments:
Post a Comment